କାଞ୍ଚି ବିଜୟର ପ୍ରତିଶୋଧ ନୁହେଁ ତ !

ମହାପ୍ରସାଦ ସମ୍ୱନ୍ଧରେ ବଳରାମ ଦାସଙ୍କ ରଚିତ ଲକ୍ଷ୍ମୀ ପୁରାଣରେ ମହାଲକ୍ଷ୍ମୀ ଶ୍ରୀଜଗନ୍ନାଥଙ୍କୁ କହିଛନ୍ତି -

“ଚଣ୍ଡାଳୁ ବ୍ରାହ୍ମଣ ଯାଏ ଖୁଆ ଖୋଇ ହେବେ ।

 ସମସ୍ତେ ଖାଇଣ ହସ୍ତ ଜଳେ ନ ଧୋଇବେ ।

ହାଡ଼ିର ହସ୍ତୁ ବ୍ରାହ୍ମଣେ ଛଡାଇ ଖାଇବେ ।

ବ୍ରାହ୍ମଣେ ଖାଇ ହସ୍ତ ମୁଣ୍ଡରେ ପୋଛିବେ ।

ଅନ୍ନ ଖାଇ ସର୍ବେ ମୁଣ୍ଡେ ପୋଛୁଥିବେ ହସ୍ତ ।

ତେବେ ବଡ ଦେଉଳକୁ ଯିବି ଜଗନ୍ନାଥ ।

ତେଣୁ ଲକ୍ଷ୍ମୀ ପୁରାଣ ଯେଉଁଠି ମହାପ୍ରସାଦ ସମ୍ୱନ୍ଧରେ ଉଲ୍ଲିଖିତ ରହିଛି, ସେଠାରେ ଜନତାଙ୍କ ଅର୍ଥରେ ନିଜର ଆତ୍ମ ପ୍ରଚାର କରିବା ପାଇଁ ସର୍ବଦା ତତ୍ପର ରହୁଥିବା ନବୀନ ସରକାରଙ୍କ ଏହା ଆଉ ଏକ ଧର୍ମ ବିରୋଧୀ କାର୍ଯ୍ୟ । ଯାହା ଉପରେ ଖୋଦ୍ ଭି. କେ ପାଣ୍ଡିଆନ୍ ମଧ୍ୟ ଚୁପ୍ ରହିଛନ୍ତି । 

ଦୀର୍ଘ ଦିନ ଧରି ଶ୍ରୀମନ୍ଦିର ଐତିହ୍ୟ ପ୍ରକଳ୍ପ ନାମରେ ପୁରୀ ବାସିନ୍ଦା ଓ ରାଜ୍ୟ ତଥା ରାଜ୍ୟ ବାହାରର ସମସ୍ତ ଜଗନ୍ନାଥ ପ୍ରେମୀମାନେ ଯେଉଁ କଷ୍ଟ ଭୋଗୁଛନ୍ତି, ଏହା ପାଣ୍ଡିଆନ୍‌ଙ୍କ ରାଜା ପୁରୁଷୋତ୍ତମ ଦେବଙ୍କ ଉପରେ ରାଗ ସୁଝାଇବା ପରି ଲାଗେ । ମହାପ୍ରଭୁ ଶ୍ରୀଜଗନ୍ନାଥଙ୍କ ଆଦ୍ୟ ସେବକ ହେଉଛନ୍ତି ଗଜପତି । ତନ୍ମଧ୍ୟରୁ ଗଜପତି ପୁରୁଷୋତ୍ତମ ଦେବଙ୍କର ବୀରତ୍ୱ ଆଜି ବି ପ୍ରତିଟି ଓଡ଼ିଆ ମନରେ ଏ ଜାତି କେତେ ମହାନ ତାହା ଅଙ୍କିତ କରେ । କାଞ୍ଚି ରାଜା ସାଲ୍ୱ ନରସିଂହ ଦେବଙ୍କ ଝିଅ ପଦ୍ମାବତୀଙ୍କୁ ବିବାହ ପ୍ରସ୍ତାବ ଦେଇଥିବା ଗଜପତି ପୁରୁଷୋତ୍ତମଦେବ ରଥଯାତ୍ରା ସମୟରେ ଛେରା ପହଁରା ନୀତି କରୁଥିବା ଦେଖି ତାଙ୍କୁ ଝାଡୁଦାର ବୋଲି କହିଥିଲେ କାଞ୍ଚି ରାଜା । ଜଗନ୍ନାଥଙ୍କ ସେବାକୁ ଏତାଦୃଶ ସମାଲୋଚନା ଓ ତାଚ୍ଛଲ୍ୟ ଦେଖି ପ୍ରତିଶୋଧ ନେବା ପାଇଁ କ୍ରୋଧିତ ହୋଇ ଉଠିଥିବା ପୁରୁଷୋତ୍ତମ ଦେବ ଓ କାଞ୍ଚି ଉପରେ ଆକ୍ରମଣ ମଧ୍ୟ କରିଥିଲେ । ମାତ୍ର କାଞ୍ଚି ସୈନିକ ତଥା ରାଜାଙ୍କ ଆରାଧ୍ୟ ଥିବା କାଞ୍ଚି ଗଣେଶଙ୍କ ପରାକ୍ରମ ଆଗରେ ଗଜପତି ପ୍ରଥମଥର ପରାସ୍ତ ହୋଇଥିଲେ । ଏହାପରେ ପୁନଃ ଜଗନ୍ନାଥଙ୍କୁ ପ୍ରାର୍ଥନା କରି କାଞ୍ଚି ଜିତିବା ପାଇଁ ଆଶୀର୍ବାଦ ନେବା ସହ ସ୍ୱୟଂ ବଳଭଦ୍ର ଓ ଜଗନ୍ନାଥ ତାଙ୍କୁ ଯୁଦ୍ଧରେ ସାହାଯ୍ୟ କରିବେ ବୋଲି କହିଥିଲେ । ବାଟରେ ମାଣିକ ଗଉଡୁଣୀଠୁ ଦହି ପିଇ କଉଡି ବଦଳରେ ରତ୍ନମୁଦି ଦେଇଥିବା ଜଗନ୍ନାଥଙ୍କ କଥା ଜାଣି ବିଜୟ ସୁନିଶ୍ଚିତ ଭାବି ନିଜର ଦମ୍ଭ ବଢାଇଥିଲେ ଗଜପତି । ଏହାପରେ କାଞ୍ଚି ବିଜୟ କରିଥିଲେ ସୁଦ୍ଧା ସାଲ୍ୱ ନରସିଂହ ଦେବଙ୍କ ଝିଅ ପଦ୍ମାବତୀଙ୍କୁ ଦଣ୍ଡବିଧାନ ସ୍ୱରୂପ ଜଣେ ଝାଡୁଦାର ସହ ଆଗାମୀ ରଥଯାତ୍ରାରେ ବିବାହ କରିବା ପାଇଁ ଆଦେଶ ଦେଇଥିଲେ । ପରବର୍ତ୍ତୀ ସମୟରେ ମନ୍ତ୍ରୀଙ୍କ ନିର୍ଦ୍ଦେଶରେ ପଦ୍ମାବତୀ

ଥଯାତ୍ରା ଦିନ ପୁରୁଷୋତ୍ତମ ଦେବ ଛେରାପହଁରା ନୀତି କରୁଥିବା ବେଳେ ତାଙ୍କ ଉପରେ ବରଣ ମାଳା ପକାଇ ବିବାହ କରିଥିଲେ । କାଞ୍ଚି ବିଜୟ ପରେ କାଞ୍ଚି ଗଣେଶ ଓ ଅନେକ ଧନ ରତ୍ନ ଆଣିଥିବା ଗଜପତି ସବୁକିଛି ମହାପ୍ରଭୁଙ୍କୁ ସମର୍ପିତ କରିଥିଲେ । କାରଣ ଏ ଜାତିର ସର୍ବସ୍ୱ ହେଉଛନ୍ତି ଶ୍ରୀଜଗନ୍ନାଥ । ଏ କଥା ଏବେର ଯୁବପିଢିମାନେ ଖୁବ କମ ଜାଣନ୍ତି, କାରଣ ତଥାକଥିତ ଇତିହାସକାର ମାନେ ଆମ ଓଡ଼ିଆ ରାଜାଙ୍କ ପରାକ୍ରମକୁ ଆମ ଇତିହାସ ବହିରେ ଗୋଟେ ବାକ୍ୟରୁ ଆରମ୍ଭ କରି ସର୍ବାଧିକ ଗୋଟିଏ ଅନୁଚ୍ଛେଦରେ ହିଁ ଶେଷ କରିଦିଅନ୍ତି । 

ତେବେ ଲୋକସେବା ଭବନରେ ହେଉ ଅବା ବିଭିନ୍ନ କାର୍ଯ୍ୟାଳୟରେ ଏହି କାଞ୍ଚି ବିଜୟ ଫଟୋ ଦେଖି ହୁଏତ ନିଜ ତାମିଲ ଅସ୍ମିତା ହାରିଯାଇଛି ବୋଲି ଅନୁଭବ କରିଥିବା ପାଣ୍ଡିଆନ୍ ଏବେ ଓଡ଼ିଆ ଅସ୍ମିତା ଉପରେ ଆକ୍ରମଣ କରିବା ଆରମ୍ଭ କରିଛନ୍ତି । ଲୋକସଭାରେ ବିଜୁ ଜନତା ଦଳର ନେତା ତଥା ପୁରୀ ସାଂସଦ ପିନାକୀ ମିଶ୍ର କହିଲେ ଶ୍ରୀମନ୍ଦିର ଚାରିପଟେ କେବଳ ଚାରିଟି ଶୌଚାଳୟ ନିର୍ମାଣ ହେଉଛି, ବାକି ସବୁ ବିରୋଧୀମାନେ ବିକାଶକୁ ବିରୋଧ କରିବା ସହିତ ମିଛ କହୁଛନ୍ତି । ତେବେ ପ୍ରଶ୍ନ ଉଠୁଛି ଯଦି ଶୌଚାଳୟ ନିର୍ମାଣ ହେଉଛି ତେବେ ଦେବ ନିମନ୍ତ୍ରଣ କ’ଣ ପାଇଁ? ମହାକାଳ କରିଡର, କାଶୀ ବିଶ୍ୱନାଥ କରିଡର ଅବା ଅଯୋଧ୍ୟାର ଭବ୍ୟ ରାମମନ୍ଦିର ଉଦ୍‌ଘାଟନ ସହ ଏହି ଶ୍ରୀମନ୍ଦିର ପ୍ରକଳ୍ପର କ’ଣ ସମାନତା ରହିଛି ? ଶତାବ୍ଦୀ ଶତାବ୍ଦୀ ଧରି ଠିଆ ହୋଇଥିବା ରଘୁନନ୍ଦନ ପାଠାଗାର, ବଡ଼ଛତା ମଠ ଠାରୁ ନେଇ ବଗଲା ଧର୍ମଶାଳା ଯାଏଁ ଏବେ ସବୁକିଛି ଭୂଲୁଣ୍ଠିତ । ଯେଉଁସବୁ ପ୍ରତିଶ୍ରୁତି ରାଜ୍ୟ ସରକାର ପ୍ରକଳ୍ପ ଆରମ୍ଭ ବେଳେ ଦେଇଥିଲେ, ତାହା ଆଜି ପାଣିର ଗାର । ଛୋଟ ଛୋଟ ଦୋକାନୀ ଆଜି ସର୍ବହରା । ରତ୍ନଭଣ୍ଡାର ସୁରକ୍ଷା, ନୀତିକାନ୍ତି ସମ୍ପାଦନରେ ଚରମ ଅବହେଳା ଦେଖିବାକୁ ମିଳୁଥିବା ବେଳେ ଏବେ ପ୍ରଥମେ ସିଂହଦ୍ୱାର ଉପରେ ପତିତପାବନଙ୍କ ଉପରେ ଥିବା ଦଶାବତାର ମୂର୍ତ୍ତି ଉଭାନ୍ । 

ସେହିପରି ମହାପ୍ରଭୁଙ୍କ ଦର୍ଶନ ନିମନ୍ତେ ଆସୁଥିବା ଭକ୍ତମାନେ ମଧ୍ୟ ଅସନ୍ତୋଷ ପ୍ରକାଶ କରୁଛନ୍ତି । ଦୀର୍ଘ ଦାବି ପରେ ସରକାରଙ୍କ ନଜରକୁ ଆସିଥିଲା । ଏହାପରେ ସରକାର ଏବେ ଶୀତତାପ ନିୟନ୍ତ୍ରିତ ଟନେଲ ନିର୍ମାଣ ଆରମ୍ଭ କରିଛନ୍ତି । ତେବେ ରଥଯାତ୍ରା ସମୟରେ ଏହି ଧାଡ଼ି ଦର୍ଶନ ନିମନ୍ତେ ଉଦ୍ଦିଷ୍ଟ ବ୍ୟାରିକେଟ ଓ ଫୁଲ କୁଣ୍ଡ ସ୍ଥାନାନ୍ତରିତ ହେଲା ପରି ଏହି ଏସି ଟନେଲ ମଧ୍ୟ ସ୍ଥାନାନ୍ତରିତ କରାଯିବ । ଅନ୍ୟଥା ରଥ ବଡଦାଣ୍ଡରେ ଗଡି ପାରିବ ନାହିଁ । ତେଣୁ ପ୍ରଶ୍ନ ଉଠୁଛି ଏହି ଉଠା ପକା ଭଙ୍ଗା ନିର୍ମାଣ ପାଇଁ ଜନତାଙ୍କ ଅର୍ଥ ସ୍ୱାହା କରିବାକୁ ରାଜ୍ୟ ସରକାରଙ୍କୁ ଅଧିକାର ଦେଲା କିଏ? କ’ଣ ନିରଙ୍କୁଶ ଶାସନ ଓ ପୂର୍ଣ୍ଣ ବହୁମତ ଦେଇଥିବା ଓଡିଶାବାସୀଙ୍କ ସହ ପ୍ରତାରଣା ଓ ପୀଡା ଦେଇ କେଉଁ ଖୁସି ପାଉଛନ୍ତି ସେମାନେ? କ’ଣ ଜଗନ୍ନାଥ କେବଳ ଭିଆଇପିମାନଙ୍କର ଠାକୁର ଯେଉଁମାନେ ପାସ ବଳରେ ସିଧାସଳଖ ଦର୍ଶନ କରିବାର ସୁଯୋଗ ପାଇବେ ଓ ଅନ୍ୟମାନେ କଷ୍ଟ ଭୋଗିବେ? ଏହା କ’ଣ ମୋ ସରକାର ସାଧାରଣ ଜନତାଙ୍କୁ ସମର୍ପିତ ୫-ଟିର ଅସଲ ପରିଚୟ? ହିନ୍ଦୁ ଓ ଓଡ଼ିଆଙ୍କ ଭାବାବେଗ ସହିତ ଖେଳୁଥିବା ଧର୍ମନିରପେକ୍ଷତାର କଥା କହୁଥିବା ନବୀନ ସରକାର କୌଣସି ମସ୍‌ଜିଦ ଓ ଗୀର୍ଜା ଚାରିପଟେ ଏପରି ଉଚ୍ଛେଦ କରି ପ୍ରକଳ୍ପ କରିପାରିବେ କି? ଯଦି ନୁହଁ ତେବେ ପିନାକୀ ମିଶ୍ର ପୁରୀକୁ ଭାଟିକାନ୍ କରିବା କଥା କହିବା ସନାତନ ଧର୍ମ ଓ ବିଶ୍ୱ ଆଧ୍ୟାତ୍ମିକ କେନ୍ଦ୍ର ବିନ୍ଦୁ ପୁରୀର ଅସ୍ମିତା ଉପରେ ପ୍ରଶ୍ନବାଚୀ ସୃଷ୍ଟି କରୁନାହିଁ ତ ?

ତେଣୁ ଶେଷରେ କୁହାଯାଇପାରେ ନିଜକୁ ଇତିହାସରେ ସାମିଲ କରିବା ପାଇଁ ଭୂଗୋଳ ବଦଳାଇ ଆତ୍ମ ପ୍ରଚାର କରୁଥିବା ଲୋକକୁ ହୁଏତ ସାହିତ୍ୟର କିଛି ଶବ୍ଦ ସଜାଇ ଦେଇପାରେ, କିନ୍ତୁ ସଂସ୍କୃତି କେବେ ବି କ୍ଷମା ଦେବ ନାହିଁ ।